ಪ್ರಕಾಶ ಅಣ್ಣ - ಆಶಾ ಅತ್ತಿಗೆ ನಿಮಗೆ ವಿವಾಹ ದಿನದ ಶುಭಾಶಯಗಳು

ಶಿವ ತನ್ನೊಳಗೆ ತಾನು ನಗುತಿದ್ದಾಗ ಪಾರ್ವತಿ..

"ಏನೂಂದ್ರೆ ಒಬ್ಬರೇ ನಗುತ್ತ ಇದ್ದೀರಾ? ಏನು ಸಮಾಚಾರ...!!!"

"ಏನಿಲ್ಲ ಪಾರು..ನಾನು ನನ್ನ ಮಡದಿಯನ್ನ ತಲೆಯ ಮೇಲೆ ಕೂರಿಸಿಕೊಂಡೆ.."

"ಅದಕ್ಕೆ"

"ಪೂರ ಕೇಳು...ನಮ್ಮ ಲಕ್ಷ್ಮಿಕಾಂತ ವಕ್ಷಸ್ಥಲದಲ್ಲಿ ತನ್ನ ಮನದನ್ನೆಯನ್ನ ಇರಿಸಿಕೊಂಡ

"ಹೂಊಊ"

ನಮ್ಮ ಚತುರ್ಮುಖ ಸರಸುವನ್ನು ಸದಾ ತನ್ನ ಬಳಿಯಲ್ಲಿಯೇ ಇರಿಸಿಕೊಂಡು ಸುಮಧುರ ವೈಣಿಕ ಗಾನವನ್ನು ಸವಿಯುತಿದ್ದಾನೆ"

"ಸರಿ"

"ಭೂಲೋಕದಲ್ಲಿ ಇವರೆಲ್ಲರನ್ನು ಮೀರಿಸಿದ ಒಬ್ಬ ಬ್ರಹ್ಮ ಇದ್ದಾರೆ"

"ಹೌದೆ!! ಯಾರು ಅದು"?

"ತನ್ನ ಕುಶಲತೆಯಿಂದ ಗೃಹ, ಮನೆಗಳನ್ನೂ ಕಟ್ಟುತ್ತ..ಅಷ್ಟೇ  ಕುಶಾಗ್ರಮತಿಯಿಂದ ಪದಗಳನ್ನು ಜೋಡಿಸುತ್ತ..ಎಷ್ಟೋ ಸ್ನೇಹಿತರಿಗೆ ಒಳ್ಳೆಯ ಸ್ನೇಹಿತರಾಗಿ , "ತಂಗಿಯರಿಗೆ" ಅಣ್ಣನಾಗಿ, ತೆಳ್ಳಗಿರುವರಿಗೆ "ಡುಮ್ಮಣ್ಣನಾಗಿ" ರಂಜಿಸುತ್ತಿರುವ...ಪ್ರಕಾಶ..ತನ್ನ ಹೆಸರಲ್ಲೇ ತನ್ನ ಮನದನ್ನೆಗೆ ಜಾಗ ಕೊಟ್ಟಿರುವುದು ಎಷ್ಟು ಚೆಂದ ಅಲ್ವ..."

"ಓಹ್ ಹೌದು..ನಾನು ಅವರ ಬಗ್ಗೆ ಕೇಳಿದ್ದೆ..ಅವರ "ಹೆಸರೇ ಬೇಡ"..."ಇದೆ ಅದರ ಹೆಸರು" ಪುಸ್ತಕಗಳನ್ನು ಓದಿದ್ದೆ..ಎಷ್ಟು ಶಾಣೆ ಇದೆ ಅವರ ಬರಹ.....ಓಹ್ ಹೌದು..ಇಂದು ಅವರ ವಿವಾಹವಾದ ದಿನ...ಅಲ್ಲವೇ"

"ಹೌದು ಪಾರು..ಅದಕ್ಕೆ ನಿನಗೆ ಅವರ ಪರಿಚಯ ಮಾಡಿಸೋಣ ಅಂತ ಅಂದುಕೊಂಡರೆ..ನಿನಗೆ ಅವರ ಬಗ್ಗೆ ಎಲ್ಲವು ಗೊತ್ತು..ಒಳ್ಳೆಯದೇ ಆಯಿತು ಬಿಡು..."

"ಹೌದೂ ಅಂದ್ರೆ...ಅವರಿಗೆ ಸದಾ ಅವರ ಆಶಯ, ಕನಸು, ಮನಸು, ಗೆಲುವು ಎಲ್ಲವು ಸಿಮೆಂಟ್, ಮರಳು, ನೀರಿನ ಹಾಗೆ ಬೆರೆತು..ಯಶಸ್ವಿ ಆಶಾ ಕಟ್ಟಡದಲ್ಲಿ ಪ್ರಕಾಶಮಾನರಾಗಿ ಆಶಿಶ್  ಸೌಧದಲ್ಲಿ  ಸುಖ ಸಂತೋಷದಲ್ಲಿ ಬೆಳಗಲಿ ಎಂದು ಹಾರೈಸೋಣ..."

ಪ್ರಕಾಶಿಶ್  (ಪ್ರಕಾಶ..ಆಶಾ..ಆಶೀಶ್) ಸುಖ, ಸಂತೋಷ, ನೆಮ್ಮದಿ ನಿಮ್ಮದಾಗಲಿ..